TUGAS MATERI PAWARTA BASA JAWA

Tulisen tugas ing ngandhap menika wonten ing buku tulis pelajaran Basa Jawa panjenengan, lajeng dipungarap, dipunkempalaken!

Wangsulana soal-soal ing ngandhap menika kanthi cetha saha ngginakaken tata basa Jawa ingkang leres!

Kagatosna wacana pawartos basa Jawa ing ngandhap menika kanthi permati!

Warga Kelurahan Brontokusuman, Ngayogyakarta, dinten Minggu (21/9) sonten nggelar pesta rakyat Merti Tumpeng Robyong Dewa Bronto ing bantaran Lepen Code, sangandhap Kreteg Tungkak. Lampahing upacara kapurwakan dhahar tumpeng sesarengan kalajengaken Upacara Raja Nungsang.

Kridha punika ajeg dipungelar saben tanggal 21 September. Lampahing upacara kapurwakan dhahar tumpeng sesarengan. Ing kalodhangan punika dipuncawisaken 12 tumpeng alit lan 2 tumpeng ageng jangkep lawuhan lan woh-wohan. Tumpeng robyong dados pralambang guyub rukun sarta minangka pratelan raos syukur warga dhumateng Gusti Ingkang Hakarya Jagat.  Sasampunipun dhahar kembul dipungelar Sendratari Prawira lan Upacara Raja Nungsang, kawiwitan kidung tolak bala. Raja Nungsang inggih lampah upacara dening rombongan bergada ingkang ngusung raja ngangge tandhu, nungsang ilining Lepen Code. Dhateng sangajengipun sang nata, para sesepuh kampung dedonga lan nyawuraken  sekar.

Lampahing kridha kalajengaken kirab bregada ingkang ngarak kalih gunungan, gunungan sayuran pisumbang saking Peken Prawirotaman, sarta gunungan tela pisumbang saking Peken Tela Karangkajen. Kirab bidhal saking Kreteg Tungkak, langkung Jalan Kolonel Sugiono, Jalan Parangtriris, Jalan Menukan, Jalan Sisingamangaraja tumuju Kecamatan Mergangsan. Sasampunipun dumugi kecamatan gunungan dipunrayah dening warga.

Kapethik saking www.jogjatv kanthi ewah-ewahan sawetawis

1.     Sinten ingkang ngawontenaken pesta rakyat Merti Tumpeng Robyong Dewa Bronto?

2.     Wonten ing pundi acara pesta rakyat Merti Tumpeng Robyong Dewa Bronto menika dipunwontenaken?

3.     Kapan acara pesta rakyat Merti Tumpeng Robyong Dewa Bronto menika dipunwontenaken?

4.     Menapa ancasipun dipunwontenaken acara pesta rakyat Merti Tumpeng Robyong Dewa Bronto menika?

5.     Kadospundi urut rantaman acara pesta rakyat Merti Tumpeng Robyong Dewa Bronto menika?

6.     Menapa tegesipun tembung bregada ingkang wonten ing salebetipun wacana pawartos ing nginggil menika?

7.     Kaandharna menapa wosipun pawartos ingkang wonten ing nginggil menika!

8.     Kasebatna piwulang menapa ingkang saged dipunpendhet saking pawartos ing nginggil menika! (kasebatna 2)

9.     Wacana ing nginggil menika kalebet wacana pawarta basa Jawa ingkang leres, katitik saking unsur 5W saha 1H. Cobi kaandharna menapa kemawon ingkang dipunwastani unsur 5W saha 1H menika!

10.  Tiyang ingkang macakaken pawarta menika kedah nggatosaken mapinten-pinten perkawis. Cobi kasebatna 4 unsur ingkang kedah dipungatosaken dening presenter pawarta ing televisi!